Conceyu Abiertu por Mieres pide que'l plan d'axuste en Mieres afeute a los partíos políticos del Ayuntamientu

Depués de saber que'l gobiernu llocal de Mieres d'Izquierda Unida, nun va recurrir la sentencia qu'anula l'axuste o recorte municipal sobre trabayadores del conceyu entendemos dende Conceyu Abiertu por Mieres que s'abre un nuevu escenariu. El recorte comtempla 1,4 millones d'euros al añu nos sueldos de los y les trabayadores municipales. Esti recorte nun afeuta a les perceiciones que reciben los partíos políticos con representación nel conceyu, pesie a que l'axuste llocal ye yá de 3'2 millones d'euros.

Dende Conceyu Abiertu por Mieres queremos tresmitir la nuesa posición respeutu a esta situación, la cual mos paez vergoñosa. Agora que paez que sindicatos y alcaldía van sentase p'aldericar camentamos qu'hai de dexar delles coses clares si queremos tener una solución equilibrada al gran problema qu'hai en Mieres. En primer llugar, dexar claro qu'entendemos que ye necesariu que l'axuste afeute de forma direuta a los grupos políticos que tienen representación nel conceyu y nun recaigan sobre los trabayadores públicos municipales. Dende que'l gobiernu d'Anibal Vázquez algamó l'alcaldía de Mieres ta pidiendo sacrificios a los emplegaos y emplegaes del Ayuntamientu y la ciudadanía pero entá nun tocaron los sos sueldos. Poro, Conceyu Abiertu por Mieres considera esti proceder del gobiernu d'IU como unilateral, egoista y pocu éticu nos tiempos que cuerren, y más sabiendo la situación económica y social del Conceyu de Mieres.

Tamién, dende Conceyu Abiertu por Mieres queremos espresar qu'atalantamos necesariu redefinir un plan d'axuste nel conceyu onde los especuladores y los grupos políticos seyan los principales afeutaos, entendiendo la so gran responsabilidá na situación d'endeudamientu que vivimos en Mieres. Los trabayadores municipales nun puen cargar colos años de marafundiar perres y clientelismu cacique, tienen de ser los responsables quienes rindan cuentes. Poro, naguamos por una redefinición del plan d'axustu llaboral mierense que tea en cuenta les necesidaes y la situación llaceriosa de la mayoría social de Mieres. Pa finar, dende Conceyu Abiertu por Mieres pidimos a Izquierda Unida que demuestre a la población del conceyu que son una formación política d'izquierdes, yá qu'hasta agora'l proceder d'IU ta comtemplando munches midíes derechistes. Tamién que los sindicatos interllocutores nel procesu de negociación tean al altor de les circunstancies y nun dean un pasu atrás pa colos intereses de los y les trabayadores.

www.conceyuabiertu.org