Énte la que paez inminente entrada en vigor de la "Ordenanza de convivencia ciudadana" aprobada pol grupu popular del Ayuntamientu d'Uviéu, Fai!, organización d'esquierda asturiana, llevó al Comité Executivu del Conseyu de la Mocedá d'Uviéu, entidá qu'ostenta la representatividá del asociacionismu mozu d'Uviéu y la comunicación coles instituciones del conceyu, una propuesta de resolución d'urxencia con un posicionamientu énte esti tema.
Na resolución, que finalmente foi aprobada, pídese un conceyu del presidente del Conseyu de la Mocedá d'Uviéu, David Mérida, cola conceyala de Seguridá Ciudadana, Conchita García, pa treslladá-y les propuestes de la mocedá aprobaes pol Conseyu no que cinca al ociu y a les llibertaes d'espresión y artístiques nesti conceyu, que choquen frontalmente cola nueva ordenanza. Asina, pa rematar la oposición del Conseyu de la Mocedá, la permanente del CMU va confeccionar un mural artísticu y reivindicativu na fachada de la so sé a la escontra de la entrada en vigor d'esta ordenanza nueva y pola apertura d'un procesu de debate popular ente la ciudadanía no que cinca a estes temátiques nes que de xuru que va haber puntos d'entendimientu más alló de la vía represora, la de les multes y l'acosu, pola que paez apostar esti Ayuntamientu de Gabino de Lorenzo.
A xuiciu de Fai!, esta ordenanza penaliza y coarta d'una manera mui grave la llibertá d'espresión al traviés de campañes d'axit-prop o l'arte urbanu con penes de trés mil euros, por exemplu, al tiempu que tamién va torgar la mendicidá, la persecución a les prostitutes o de les espresiones populares d'ociu y consumu d'alcohol nes cais.
Fai! entiende qu'en realidá l'Ayuntamientu d'Uviéu regula per escrito lo que venía asocediendo de facto nos últimos años, cola persecución de les formes alternatives d'espresión, negándonos los calces tradicionales de difusión de convocatories, campañes etc. a los coleutivos sociales d'Uviéu, afogando les reivindicaciones que-y molesten, nun conceyu nel que la democracia nun s'atopa per nenyuri. Un conceyu al que-y habríen de dar el premiu, tamién, de "espátula d'oru", arriendes de ser esta ferramienta indispensable nel llabor de les brigaes de llimpieza, con instrucciones precises pa la erradicación de cualisquier mensaxe "subversivu" que llegue a les cais d'Uviéu. Por supuesto, estes instrucciones que torguen la contrainformación nun se dan cuando se promocionen eventos como corríes de toros, circos o nes mesmes elecciones, tapando la voz de "los y les que molesten" pa que nun tengan espaciu pa la so espresión.
No que cinca al coleutivu inmigrante y a la xente más necesitao esta persecución fáise inda más ablucante, pretendiendo "llimpiar les cais de maleantes" al más puru estilu de la estrema derecha. Daquién habría d'entrugá-y a la Conceyala de "Seguridá Ciudadana" uvieína cómo va facer frente una persona indixente a una multa por mendicidá, si esta mesma ye la razón pola que malvive nes cais d'Uviéu, ensin programes de prevención y reinserción social nin viviendes sociales suficientes pa facer frente a una crisis de la que les y los probes nenguna culpa tienen. Al tiempu, perseguiráse l'exerciciu de la prostitución -nin siquiera a los usuarios- col acosu a les trabayadores. Nesti sen, brilla pola so ausencia'l debate ciudadanu y col propiu coleutivu de trabayadores sobre la so situación, demandes, espectatives etc. siguiendo col avezáu exerciciu de la hipocresía consistente en mirar pa otru llau y acoyer postures efectistes de cara a la sociedá como esta.
Tampoco podemos dexar de llau la idea qu'esporta esta conceyalía de la mocedá uvieíno, cola criminalización de les formes d'ociu y consumu d'alcohol nes cais, onde va acosase a les moces y mozos que tean en grupu -más de trés xuntos, como nes cárceles-, con una política de persecución y paternalismu, plantiando la dureza de les porres y les citaciones xudiciales frente a la formación de la mocedá en formes d'ociu alternatives o más atractives que les que se planteguen por un sector hosteleru que, otramanera, trema énte fenómenos nos que la mocedá ruempe los sos esquemes y les sos normes como nel casu del nomáu "botellón". Tamién tarán prohibíos los usos deportivos d'ociu de les víes públiques, como nel casu del skating, les bicicletes o'l patinaxe, curiosamente, ensin plantegar zones específiques pa la práutica d'estos deportes, quiciabes col enfotu de recaudar fondos ente una mocedá incapaz d'emancipase pa facer frente a la situación de bancarrota d'un ayuntamientu, consecuencia d'una xestión deficiente de munchos años.
Poro, Fai! felicita a les entidaes del CMU que col so sofitu faen partícipe al Conseyu nesa oposición a una ordenanza nefasta pa la vida democrática uvieína y amuesa'l so apoyu a cualisquier iniciativa qu'unitariamente se posicionare a la escontra de la mesma.
ORDENANZA REPRESORA ¡NON! CONVIVENCIA CIUDADANA Y DEMOCRACIA DIRECTA Y ASAMBLEARIA ¡SÍ!
N'Uviéu, a 18 de payares de 2009.
Estrayíu de la páxina web de Fai Asturies.
No hay comentarios:
Publicar un comentario